Мәскәүдә Бөтенроссия семинар-киңәшмәсе
2025 елның 6-8 августында Мәскәүдә Бөтенроссия семинар-киңәшмәсе узды. Бу Россия дәүләт техник күзәтчелек органнарының ел саен уздырыла торган иң зур форумы. Чарада Россия Федерациясенең төрле субъектларыннан дәүләт техник күзәтчелек органнары җитәкчеләре катнаша. Татарстан Республикасыннан Татарстан Республикасы Дәүләт техник күзәтчелек идарәсе башлыгы Альберт Борһанов һәм Дәүләт техник күзәтчелек идарәсенең күзәтчелек һәм автоматлаштырылган нигездә исәпкә алу бүлеге башлыгы Илнур Җәләлетдинов катнашты.
Семинарның девизы – профессионаллар диалогы. Төп темалар арасында дәүләт техник күзәтчелек органнары эшчәнлегенең иң актуаль мәсьәләләре: «Үзйөрешле машиналар һәм техниканың башка төрләре турында» федераль законны гамәлгә ашырудан алып башка федераль ведомстволар белән хезмәттәшлеккә кадәр.
Россия Федерациясе авыл хуҗалыгы министры Оксана Николаевна Лут чыгышы аеруча әһәмиятле булды, ул дәүләт техник күзәтчелек органнарының авыл хуҗалыгын үстерү дәүләт программасы чараларын гамәлгә ашыруда һәм авыл хуҗалыгы продукциясе, чимал һәм азык-төлек базарларын җайга салуда, шулай ук үзйөрешле машиналарны һәм аларның тагылмаларын имин һәм нәтиҗәле эксплуатацияләүне тәэмин итүдә зур ролен билгеләп үтте.
Чара программасына түгәрәк өстәлләр, Мәскәү шәһәре Дәүләт техник күзәтчелек идарәсенең эш тәҗрибәсе белән танышу, шулай ук Мәскәүдә Дәүләт техник күзәтчелек идарәсенең Россиядә беренче флагманы КФҮ карау кертелгән иде. Үзәк техник карау, техниканы теркәү һәм имтиханнар кабул итү өчен иркен зоналары, үзйөрешле машиналарның берьюлы 6 категориясе буенча имтихан тапшыру мөмкинлеге, шулай ук объектив бәя бирү өчен датчиклары һәм камералары булган «акыллы полигон» инновацион системасы белән гаҗәпләндерде. Авыл хуҗалыгы министры Оксана Лут әлеге Үзәкне ачканда, мондый алым – дәүләт хезмәтләренең киләчәге, дип билгеләп үтте. Үзәк цифрлаштыруны, тизлекне һәм гражданнар өчен уңайлылыкны берләштерә.
Әлеге чара актуаль мәсьәләләр буенча фикер алышу һәм техник күзәтчелек өлкәсендә эшнең нәтиҗәлелеген арттыру өчен кирәкле тәҗрибә уртаклашу мәйданчыгына әверелде.